amzeriad

• Prantad amzeriet a zegouezh gant buhez un dra bennak, ur prantad eus buhez unan bennak, gant un darvoud pe ur prantad eus istor mab-den pe a dalvez da reoliañ un obererezh.

  Ar Skol Veur a zo krouet 36 vloaz zo. Eun amzeriad hir eo ze, hag eun neubeud krouerien a zo arru koz-koz. (An Oaled, niv. 54, 1935, p. 337)

  Ne maint ket da damall’ vit kêlou ze : pep amzeriad an eus e c’hiz. (Jaffrennou, 1938:185)

  A-zivout an amzeriad-mañ, lenn A. Meillet, Trois conférences sur les Gatha de l’Avesta, 1925, pp. 21-6. (Mordiern, 1938:42)

  Reolennoù strizh a spisa an amzeriadoù ma c'heller troc'hañ bezhin, ar bezhin-tonn hepken o c'hellout bezañ dastumet a-hed ar bloaz. (Bihannig, 1968:38)

  Piv vo eno ? Ar memes re, moarvat : kozh emsaverion gozh o verlobiñ war amzeriad kaer Breiz Atao pe SBB (1) ; an hini a zesk brezhoneg abaoe pemzek vloaz hep bezañ gouest da vont pelloc'h eget pempet kentel ar c'hCours Elémentaire ; […] bez' e vo... (Josse, 1969:331)

  An amzeriad-se eo hini va mignoniezh gant Yann, ma 'z aemp un dek ac'hanomp eus Roazhon da Cesson pe d' ar Pilletière evit gwelout Tata Vallée en ur ganañ a bouez hon fenn kanaouennoù berzet : koñ kenan e c'hell hañvalout bremañ - hag e oa evit gwir - met se oa d' an ampoent nemorant tout an emsav. (Arzel Even, m. gt. Étienne, 1972:21)

  Troc'het e voe koulskoude an amzeriad-se gant ur gwall gaouad goude 1860, ar Brezel-diabarzh. (Kongar, 1978:110)

• [Gant ur pennanv implijet da stagenn.] Prantad pe hollad prantadoù gouestlet d’un obererezh bennak.

  Berr a-walc'h eo bet da amzeriad labour, evel skrivagner, met heklevioù souezhus ac'h eus dihunet e-kreiz hor c'halonoù. (Langleiz, 1972:124)

  D' ar c'houlz ma adkroge prezidant hag eilprezidant gant o eil amzeriad ren, edo ar Reveulzi e Bro-C'hall en he gwashañ, ha brezel a oa savet etre ar C'hallaoued hag ar Saozon. (Kongar, 1977:382)

  (Ent-krenn.) Prantad ma tle un dilennad embreger e garg.

  Unan eus ar brezidanted-se hepken, Franklin D. Roosevelt, a zo bet adanvet teir gwech (met mervel a reas a-vec'h boulc'het gantañ e bevare amzeriad). Dek anezho, en o zouez c'hwec'h eus ar seizh prezidant kentañ, a reas daou amzeriad e penn ar vro ; tri all a oa bet adanvet, met ne zeujont ket a-benn eus o eil goumanant, evit abeg pe abeg, peurvuiañ dre ma vezent bet falc'het gant an Ankou, ar pezh ne c'hoarvezas ket gant Richard M. Nixon pa roas e zilez e 1974. (Kongar, 1977:386)

Krediñ a reomp eta rentañ servij o reiñ amañ, en un nebeut pajennoù, un diverrañ eus diskleriadurioù an oberour diwar-benn orin, amzeriad, kefridi savadurioù meurvein Karnag. (Gwengourien ha Glanndour, 1955:28)

Nep hini a c'hoarvez dezhañ gweladenniñ ar savadurioù bras-se a ra dizale outañ e-unan an tri goulenn-mañ : pehini eo amzeriad ar steudadurioù hag ar c'helc'hiadoù-se, pere o saverion, pehini o fal hag o zalvoudegezh ? (Hülle, Gwengourien ha Glanndour, 1955:30)

Ar arroudadurioù-se a glot evit gwir gant ar pevar amzeriad pennañ e buhez ar maezioù : 8 a viz Du, haderezh ; 4 a viz C'hwevrer, eginerezh ; 6 a viz Mae, bleunierezh ; 8 a viz Eost, mederezh. (Hülle, Gwengourien ha Glanndour, 1955:33)

Conaire (Padraic O.). - Deoraidheacht. Uirsgéal. An dara eagran. - Baile Atha Cliath agus Corgaigh, Comhlucht oideachais na Eireann, hep amzeriad. - In-8°, 149 p.
Setu troidigezh an talbenn : Harlu. Romant. Eil mouladur. N' em eus kavet amzeriad ebet war al levr. (Olier, 1965:199)

Goude ar brezel ec'h embannas e-pad ur pennad ur gelaouennig e rannyezh Wened, anvet En Had, harpet evit doare gant tud evel Roperzh ar Mason hag Iwan an Diberder. An niverenn gentañ o tont er-maez a zouge an amzeriad Mae-Mezheven 1951 ; hag an daouzekvet, ha diwezhañ kement ha ma ouzon, hini miz Eost 1956. (Al Liamm, niv. 166-167, 1974, p. 448)