Adc'heriadur brezhoneg

gant Yann-Vadezour ar Rouz

Ned eo ket ur geriadur klok a gavoc'h el load-mañ. Un nebeud penngerioù hepken a zo kinniget eno, rak n’eo bet graet ar geriadur-mañ nemet evit klokaat eil embannadur ar geriadur brezhoneg unyezhek embannet gant An Here1. Ar gerioù a gaver amañ eo ar re :

Evit penngerioù zo ez eus bet lakaet ivinennoù evit ma vefe aesoc'h kavout ar gerioù kar.

Setu bremañ un nebeud displegadennoù evit ar re o deus c'hoant da c'houzout muioc'h a-zivout al labour-mañ. Meur a abeg a oa evit kendelc'her al labour boulc'het gant ar geriadurourion o deus savet ar geriadur brezhoneg unyezhek.

Da gentañ, kavet ez eus gwell sevel un ostilh e brezhoneg penn-da-benn evit ar vrezhonegerion. Re nebeut a draoù e brezhoneg a gaver ha kement-se ne zoug ket Yann vrezhoneger da ober gant e yezh. Rall eo ar geriadurioù unyezhek e-skoaz ar geriadurioù divyezhek ; ha kalz muioc'h a c'herioù a vank enne p’o lakaer holl a-gevred. Ar 21 016 pennger a gaver er geriadur brezhoneg unyezhek ned int ket trawalc'h evit bastañ d’an ezhommoù pemdez zoken. Ha dirak kalz gerioù all en em gav al lennerion gwall alies. Marteze e c'hallo an degasadenn-mañ sikour hini pe hini neuze, daoust pegen treut e chom an danvez enni.

D’an eil, daoust pegen talvoudus e c'hallont bezañ, ned eo ket a-walc'h kaout geriadurioù divyezhek.

  1. Dipitus e vefe rediañ ar vrezhonegerion da dremen atav dre ar galleg evit intent ur ger en o yezh. Ned eo ket tonket ar brezhoneg da vezañ troidigezh ur yezh all. Ur c'holl e vefe, rak talvezout a rafe e vefe kaset da arouez, kollet gantañ e wir dalvoudegezh. Ne ziwanfe menozh ebet anezhañ ken ha ne chomfe dezhañ nemet ur seurt vuhez kalvezel.
  2. Touellus eo an troidigezhioù. Kaoz int a galzig drougimplijoù, rak disheñvel eo sterva hag arver ar gerioù e pep yezh.
  3. Ur yezh eo ar brezhoneg drezañ e-unan, ha n’eo nemet a-drugarez da dermenadurioù resis ha dre studiañ arverioù ar gerioù e c'haller kompren mat o ster, ha gant skwerioù eo e c'haller anavezout o arverioù.

Evit echuiñ, gwell ez eus bet kavet klask reiñ termenadurioù klokoc'h ha muioc'h a skwerioù eget lakaat gerioù a-vil-vern en adc'heriadur-mañ. Sur a-walc'h en deus sioù c'hoazh. Gwellaat ul labour a c'haller ober dalc'hmat. M’ho peus evezhiadennoù da ober, kit er bajenn « Darempred » ha kasit ur c'hemennad din.

Ho pezet plijadur o sellet e-barzh !

1. Menard, Martial ; Kadored, Iwan (renerion) : 2001. Geriadur brezhoneg. Plougastell-Daoulaz : An Here.