droukprezeg

Lavaret traoù diouzh noazhout da vrud unan bennak pe un dra bennak.

1. Implij antrazeat.

   Pa lavar Doue d’eom, er memez Skritur zakr : « Ne laeri ket tra da nesa ; ne zroukprezegi ket, » mar laerom ha mar droukprezegom, e yeom a eneb an difenn en deuz Doue greet ouz-om ag e pec’hom. (Kerzale, 1866:347)

   Pa vez en em blasset hag en em zastumet kement teod fall zo er vro, neuze e koumans ar jabadao ; pep-unan a lavar huela ma hell ar pez a c’hoar divar benn he-mâ, divar benn hounnez ; an teodou o koueza va renou mad an nessa evit ho dispenn a ra muioc’h a drouz eghet ar golviji o koueza var al lienach ; klevet a rer ive flipadou druz lavaret an eil d’heben, ha memes farserez vil ha dizonest pere a zesk d’ar strinkellou yaouang hag ar pez a ouzont dija hag ar pez ne ouzont ket c’hoaz ; en eur gher, merc’hed ar poull-kanna a zo muïoc’h a drouz gant-ho eghet gant ar raned er prat, eghet gant ar piket pa zigraker d’heo ho neichou ; ne reont nemet drouk-prezeghi a rei gouall skouer d’ar re yaouank. (Feiz ha Breiz, 1867, p. 238)

   An eizvet gourc’hemenn a Zoue a zifenn ouzomp noazout da vrud vat an nesa o lavarout gevier, o rei testeni faos, o troukprezeg, o tamall e gaou hag o trouksonjal. (Uguen ha Tad Eujen, 1930:584-585)

   Droukprezeget, tamallet e gaou e peus ; goapaet, mallozet Doue, lavaret gaou ha gaou betek falstoui e peus… (Feiz ha Breiz, niv. 3, 1937, p. 68)

   Evit kas da wir ar sorc’hennou-se, e todorosont gevier, e tuont, e troukprezegont, e lazont, e verzeriont, e vac’homont. (Mordiern, 1938:80)

   Ar prezegennoù d’ar gwener d’abardaez, ma krog ganto ar c’hendalc’h, a vez graet evit ar c’hant bennak a dud a blij dezo klevout prezegennou e brezoneg, n’eus forz diwar benn petra e vijent. Met droukprezeg a ran, rak plijadur vras hon eus bet o klevout Visant Seite o tibuna dimp labour ar Bleun-Brug a-hed ar bloaz, al lizerou kaset gantañ, an abadennou sinema roet e-pad ar goañv gant filmou ar Bleun-Brug, bodadeg ar yaouankiz e Brest da vakañsou Meurlarjez, ar Bleun-Brugou bihan e Gwerran, Pontekroaz, Plougernev, Baod... (Glanndour, 1952:4)

2. Implij trazeat eeun.
   • [Ar glokaenn a zo un den pe un hollad tud.]

     Ma tigas kollou bras betek ennomp, ma ten ar yec’hed diganeomp, ma ’z omp gwallgaset, droukprezeget, tamallet e gaou gant an dud, n’ankounac’haomp ket ez omp evel-se henveloc'h ouz Jezuz-Krist, hor Mestr, ha gouzanvomp an holl boaniou-se dre garantez evitan ha gant eur spered a binijenn, o sonjal hon eus meritet kalz muioc’h c’hoaz. (Uguen ha Tad Eujen, 1930:285)

     Da genta, difenn a ran ouzit drougprezeg va zad ; rak kement e talv d’ezan e vrud vat evel ma ra d’az tad-te derc’hel e hini. (Kannad Arvor, niv. 2830, 1933)

     Hag ezhomm hoc'h eus c'hwi
     D' am droukprezeg da gement pichon a zired ? (Shakespeare hag Emily, 1962:330)

   • [Ar glokaenn a zo un dra pe un hollad traoù.]

     Savit ho penn ’ta, tudou, savit huel ho penn dirag ann dud a glevot o troukprezeg ar feiz […] (Kannad Arvor, niv. 281, 1885)

3. Implij trazeat ameeun.

   Droukprezeg a, eus, a-zivout, diwar-benn, diwar-bouez ub. pe udb.

   • [Ar glokaenn a zo un den pe un hollad tud.]

     Nep, emezhao, a iafe da zroukprezeg euz ar Suiset dirag hor soudardet, a gafe distro buan, rak ho c’halon zo leun a anaoudegez vad evit an digemer o deus cavet er vro-ze. (Feiz ha Breiz, niv. 322, 1871, p. 66)

     Ne gomprenan ket perak ez afe eun den e kounnar abalamour ma troukprezeger diwar e benn. (Chonagon ha Hemon, 1931:26)

     Ma ne garan ket an hini en deus droukprezeget war va divout, hen talvezout a rin d'ezañ dre flemma anezañ dirak an holl. (Chonagon ha Hemon, 1931:26)

     Er skridoù-faltazi n' he deus ket lezet an Emsavadeg roud don ebet. E saozneg zoken : hañval eo e oa an darvoud re glodus evit d' ar romantour ober gantañ da lien-adreñv ha darn anezho o deus bet c'hoant da zroukprezeg diwar e bouez koulz ha diwar-bouez e gedern, evit bezañ gouest da sklerijennañ seul welloc'h o c'hrouadurioù-i. (O’Snodaigh, 1967:44)

     Ur wech ma oa droukprezeget en un doare goapaus ha lous eus ur chaloni ha n'eo ket bet eus e vignoned e tiskouezas e zisplijadur. (Heusaff, 1978:338)

   • [Ar glokaenn a zo un dra pe un hollad traoù.]

     Mes eun tachad a zo, ar gazeten-man a stagaz da zroukprezeg euz ar relijion gristen hag euz ar feiz. (Kannad Arvor, niv. 1797, 1914)

     Nebeut, a drugare Doue, a vez gwelet o vont keit hag an hini diveza-man, hag o trougprezeg en eun doare ken divalo eus eur vicher hag ez eo o dever kenta lakaat he c’harout. (Kannad Arvor, niv. 2266, 1923)

   Droukprezeg da ub. diwar-benn uba.

   Pe daoust ha droukprezeget e oa bet d’ezhañ diwar he fenn ? (Hemon, 1932:31 ; s. i. o. Hemon:1942)