mamm-ioù-gozh
daskemmet d’ar 25.02.2023.
Berradur : fesk. feskenn ; k. kartenn ; pg. pennger ; st. eb. stumm etrebroadel.
Termenadur
mamm-ioù-gozh, mammoù-ioù-kozh, pennanv niveradus benel.
Mamm d’an tad-kozh pe d’ar vamm-gozh. Heñvelsterioù : gourvamm-gozh, mamm-gozh-kuñv, mamm-gun (ster 2), mamm-guñv, mamm-ioù (ster 3).
Ec'h an da vezañ mamm-ioù-gozh e miz Eost. (Gros, 2014:pg. Mamm)
Takad arver
Klotañ a ra ar ger gant tad-ioù-kozh, testeniekaet e Treger Vras (Ar Rouz, 1963:k. 574 ; An Du, 2001:k. 576), nemet er mervent, e Treger Vihan, e Goueloù hag e Kernev-Uhel (Ar Rouz, 1963:k. 574).
Gerdarzh
Diwar ar pennanv mamm-ioù hag an adanv kozh.
Troidigezhioù
Dre fazi ez eo bet troet mamm-ioù-gozh gant « trisaïeule » gant Jules Gros (2010:pg. mamm). En altas yezhel gant Pêr ar Rouz e klot tad-ioù-kozh gant « bisaïeul » en un takad ledan a-walc'h eus Treger koulskoude, ha n’eo ket meneget evit « trisaïeul » gwezh ebet (Ar Rouz, 1963:k. 575). En un oberenn all gant Jules Gros (2014:pg. Mamm) ez eo bet troet mamm-ioù-gozh gant « bisaïeule » avat.
Levrlennadur
Aozerien hag o deus un anv a zo disheñvel e stumm etrebroadel diouzh e stumm brezhonek : Yann an Du, Jean Le Dû ; Pêr ar Rouz, Pierre Le Roux.
Oberennoù ha pennadoù
- Gros, Jules : 2010. Le Trésor du breton parlé : Dictionnaire breton-français des expressions figurées. Brest : Emgleo Breiz.
- Gros, Jules : 2014. Trésor du breton parlé. Supplément au Dictionnaire breton-français. Fouenant : Yoran Embanner.
- Le Dû, Jean : 2001. Nouvel atlas linguistique de la Basse-Bretagne, levrenn 2. Brest : Centre de recherche bretonne et celtique, Université de Bretagne occidentale.
- Le Roux, Pierre : 1963. Atlas linguistique de Basse-Bretagne, 6vet fesk. Roazhon : Plihon et Hommay.